Вкупниот број невработени лица, евидентирани во Агенцијата за вработување, на крајот на 2020 година достигна речиси 250.000 лица. Толку висок број на евидентирани лица не е забележан од ноември 2012 година, односно во последните осум години.
Во текот на 2020 година, бројот на невработени лица во Агенцијата за вработување порасна од 189.211 на крајот од 2019 година на 245.643 на крајот на 2020 година. Односно, во текот на 2020 година бројот на невработени се зголеми за преку 56 илјади.
Ова зголемување од 30 проценти на бројот на невработените лица, според Агенцијата за вработување само во мал дел се должи на кризата предизвикана од ковид-19 вирусот. Според нив, во периодот по 11.03.2020 година регистрирани се само 17.026 невработени лица по основ одјава од задолжително социјално осигурување.
Ако само 17 илјади работници ја изгубиле работата поради пандемијата, на што се должи вкупното зголемување на бројот на евидентирани лица за дури 56 илјади? Министерката за труд и социјална политика неодамна изјави дека „еден момент кој го зголеми бројот на невработени е тоа што голем дел од нашите граѓани коишто престојуваа во странство, а кои заради пандемијата се вратија во државата и останаа, почнаа да се пријавуваат во Агенцијата за вработување, со една единствена цел да имаат пристап до онаа финансиска поддршка што државата ја даваше во вид на ваучери“.
Според нејзината логика испаѓа дека убаво било што државата го екстернализира проблемот со невработеноста, принудувајќи ги луѓето да работат по бродови и на други сезонски работи во странство. Бидејќи така владите можеа да се фалат со намалувањето на невработеноста, без тие да придонесат во таа насока.
Без разлика на објаснувањето што се дава, она што е факт е следново: бројот на невработени се зголеми за преку 56 илјади во текот на 2020 година. 56 илјади. Тоа, за споредба, е колку целото население на еден средно-голем град во Македонија. И нешто повеќе од тоа.
Детално, по месеци, бројките за движењето на невработеноста во 2020 можете да ги видите на овој линк.
Здравко Савески
