СКОПЈЕ, 27. 09. 2017 – На 25 септември во затворот Идризово, тројца затвореници се качиле на кровот на затворот во знак на револт. Затворениците фрлале со ќерамиди и неколку пати го извикувале зборот „Амнестија“, пренесуваат внатрешни извори за Гласник.
На снимката што Гласник ја доби може да се види како незадоволни затвореници се качуваат на кров и протестираат. Нашите извори од Идризово не објаснија до крај кои се конкретните причини за овој револт, меѓутоа како што истакнуваат, ваквите форми на протестирање се многу чести и се последица на малтретирањата од страна на чуварите.
Неодамна, премиерот Зоран Заев беше во посета на затворот Идризово. Според неговата изјава за медиумите, тој беше згрозен од условите на затворот, и вети дека на голем дел од затворениците ќе им следува Амнестија. На прашањето за тоа кога и дали ќе се подобрат условите во затворот, тој не даде ниту конкретно решение или мерка, ниту пак кажа дека ќе следува иницијатива за подобрување на условите.
Дел од затворениците амнестијата ја сметаат како предизборен маркетинг со кој нема да се решат условите на затворените лица, туку само ќе се купат време и гласови во очи на изборите. Судбината на затворениците коишто одлежуваат повисоки казни во затворот Идризово е неизвесна. Неодамна, Гласник објави фотографии од условите во затворот каде што може да се видат нечовечките услови на живот со кои се соочуваат затворениците.
