СКОПЈЕ, 21. 09. 2017 – Денес, во 17.00 часот, во Скопје, пред зградата на Владата на Република Македонија се одржа протестен марш. Протестниот марш беше организиран од страна на неколку иницијативи и организации како О2 коалицијата за чист воздух, Првата детска амбасада во светот – Меѓаши и Скопје смог аларам.
Од иницијативата пренесуваат дека целта на овој протест е да се алармира за загаденоста на воздухот и негово влошување поради ладните периоди коишто следуваат и потребата од греење. Исто така, се истакнува и фактот дека новата Влада треба да започне со спроведување на мерките коишто ги ветуваше пред избори. На крај спроведувањето на законите на Република Македонија да биде една од позначајните активности на Владата и институциите кои треба да обезбедат чист воздух.
На присутните на протестот им се обрати Елена Ѓорѓиевска од Скопје Смог аларм, истакнувајќи го значењето на чистиот воздух, но исто така и опасноста која доаѓа од ПМ 2/5 честиците.
„ПМ 2/5 честиците влегуваат директно во крвта, потоа се случуваат запушување на крвни садови со крвен притисок, наталожување во нашето срце, срцев удар, наталожување во белите дробови, астма, рак. Европската агенција за животна средина вели дека во само во 2013 година во Македонија пред време починале 2360 луѓе од загаден воздух со ПМ 2/5 честички, 210 предвремени случаи како резултат на загаден воздух со азодиоксид, 100 предвремени смртни случаи како резултат на загаден воздух со озон. Тоа претставува вкупно 2670 предвремени смртни случаи во Македонија од загаден воздух. Ова е само она што е измерено. Дали знаете дека во Скопје има само две мерни станици коишто мерат загадување на ПМ 2/5 честици, а тоа е нашиот најголем убиец? “ истакна Ѓорѓиевска на протестот пред Владата на Република Македонија.
Во продолжение, Ѓорѓиевска укажа на поголемиот број на смртоносни супстанци во Скопје како причина за многу смртни случаи. Исто така, го постави прашањето околу инвестицијата од страна на државата за екологијата во градот да биде здрава, а која е загарантирана со устав.
„Светски ден на мирот. Но што е мир? За мене е мир кога можам да дишам чист воздух. За мене е мир кога властите не молчат пред еколошкиот геноцид врз градот. За мене е мир кога не морам да бидам климатски мигрант и ќе можам да живеам во градот во којшто сум се родила. Политичари! Избраници на народот. Слушнете го овој апел. Искрено ве замолуваме. Грижете се за нас. Не оставајте ја екологијата на последната полица од вашиот план“ заврши Ѓорѓиевска.
Улогата на властите беше акцентирана и во говорот на Лазар Ѓуров, член на О2 коалицијата за чист воздух. Тој на почеток се осврна на есенцијалноста на воздухот за сите луѓе.
„Секој од нас кога се родил, прво што направил откако се родил е вдишал воздух. Тука во овој град се раѓаат деца. Кога првата работа што ја прават е: вдишуваат смрдлив воздух. Срамота за сите нас коишто сме возрасни и којшто првата работа којашто им ја даваме е смрдлив канцероген загаден воздух. Можеби вината за сето тоа не лежи идентично врз сите нас, затоа што имало носители на власта коишто свесно или несвесно направиле овој град да биде град на листата на најзагадени, кадешто луѓето се заболуваат и умираат од загаден воздух“ потенцира Ѓуров.
Во вториот дел од говорот, Ѓуров им се обрати на политичарите да си го одржат зборот даден пред избори, на кој граѓаните одговорија афирмативно и ја дадоа својата поддршка. Според него, блефовите веќе нема да поминуваат, затоа што доколку тие блефираат, ќе ги блефираат и своите деца.
„Го поздравуваме тоа што одлучивте да направите интерресорско тело. Реално, проблемот е тежок и ние не очекуваме да го решите сега за оваа зима. Но ако препознаеме, дека вие навистина сакате да го решавате овој проблем, навистина ќе имаме трпение да следиме како мерките се применуваат. Ве охрабруваме да ја искористите шансата затоа што сте на почеток, и да покажете сериозен и системски пристап. Да истражите каде се проблемите и чекор по чекор да ги решаваме. Проблемите се во економија, проблемите се во транспорт, проблемите се во немањето на инфраструктура, проблемите се во неажурни инспекциски тела, проблемите се во неквалитетни возила, проблемите се во нашите навики. Како што вдишувањето на воздухот е прва работа што ја правиме, нека биде и прва работа што и вие ќе ја направите“ додаде Ѓуров на неговиот говор, пред Владата на Република Македонија.
После говорите на членовите на иницијативите, протестниот марш се придвижи во Карпош 3, каде на симболички начин се даде поддршка на Граѓанските иницијативи ќе достават петиција и барања до Општина Карпош за зачувување на зелениот појас долж реката Вардар.
