Во петок Марш за нашите животи

Во продолжение следува поканата за маршот којшто ќе се одржи во петок на 20 декември 2019 година.

Во исчекувања на првиот рок за исполнување од нашите над 100 барања – 31.12.2019, #ЗеленФронт на здружени над 40 граѓански движења, иницијативи, организира втор протестен марш, во петок, 20-ти декември. Времето и маршутата остануваат исти од претходниот марш.
17:00 пред Министерството за животна средина, крајна цел: пред Влада. Остануваме на улиците за да ги потсетиме на нашите барања, затоа што ова е прашање на живот или смрт, кое не смее да чека повеќе ниту момент!

—————————
Се бориме за живот од ден за ден. Умираме во илајдници годишно од загаден воздух. Мутираме, пренесуваме на поколенијата болести поради сеопфатната загаденост во која живееме, во која се раѓаат нашите деца. Белите дробови ни се зацрнети, иако не сме сите пушачи. Живееме во време на еколошка катастрофа.

Се бориме за својот живот низ цела држава, против каменоломите над нашите глави чија прашина нè гуши, постојаните експлозии ни ги ронат домовите, против рудниците чии вековни отрови ќе останат да стојат над нашите земјоделски полиња, домови, против малите хидроцентрали кои ни ги земаат нашите реки кои пресушуваат за нас, против уништувањето на единственото светско природно и културно наследство кое го имаме, едно од 39те во цел свет, против изумирање на езерата, против уништување на шумите, против депониите на секој чекор, против отровните чадови кои постојано се шират од нив, против канцерогениот дим од запалените кабли и гуми, против игнорирањето на Ромите кои живеат во пост-апокалиптични услови во нашето непосредно соседство, против зградите кои никнуваат околу нас и ни го одземаат хуманиот живот, … се бориме секој ден со сите еколошки катастрофи кои ни се случуваат во земјава.

Ние се бориме за живот, а имаме само декларации за заложби. Бараме да се исполнат основните предуслови за да се покаже дека навистина нашите животи значат, дека илјадници прерано починати и заболени се причина нашите животи да станат приоритет на оваа држава.
Нашите над 100 барања се тие предуслови со кои власта ќе покаже дека навистина СМЕ приоритет, НИЕ, НАШИОТ ЖИВОТ и ЗДРАВЈЕ.

Ова е Марш за нашите животи низ цела земја, Скопје, Битола, Тетово, Велес, Гостивар, Струмица, Ново Село, Иловица, Штука, Струга, Охрид, Возарци, Кавадарци, Чифлик, Демир Капија, Жировница, Лабуништа, Шлегово, Пробиштип….

Нема компромис со барањето за чист воздух!
Нема изговори за непреземањето на мерки!
Нема пауза во борбата за здрава животна средина!

Ова е Марш за ЖИВОТ!

Fridays For Future Skopje, O2 Иницијатива, Не Биди Ѓубре, Здрава Котлина, Скопје Смог Аларм, Билка, Мој Воздух, Битола сака чист воздух, Група граѓани од Визбегово, Levizja Nena dhe Femija/ Движење Мајкa и Дете, Го Сакам Водно, ЕкоКарпош 3,2,1, Ние сме Карпош 4, Плоштад Слобода, Еко Долина, Младите на Штука-Иловица против рудникот, Движење за чист воздух, Охрид SOS, Здравје пред профит во Центар, Eco Guerilla, жители на Жировница, Shoqata ekologjike GvEko / Еколошко здружение ГвЕко / Ekoloji dernegi GvEko, Young Friends of the Earth Macedonia, Е.Д.Е.Н., Екоскоп, AVAJA, Struganët për Strugën/ Стружани за Струга, Скопје бара чист воздух, Шепасти ентузијасти, Дејзи Фемили, Анима Мунди, Автокоманда сака да дише, ЕД Тисовец, Еко Чифлик, Грин Пауер, Стоп на загадувањето, Спас за Водно, Еко Планета, Поинаку, Електромобилност Македонија, Генера, Корен на квадрат

#ЗеленФронт #ЗеленаРеволуција #МаршЗаЖивот #ЕкоРемет

|2019-12-19T17:57:51+00:0019 декември 2019|Актуелно, Вести, Некатегоризирано|